زلـــة عــاقـــل
سلامات ياناجي من الشر سلامات
نجـاة راسـك نعتبرهـا غنيـمـه
وجروح جسمك لو قالوا عميقـات
مع الزمن تبـرأ وتصبـح قديمـه
لكنك اسمحلي أبرسـل اشـارات
من قلب صافي للعقـول الفهيمـه
ماقولهـا مـزحٍ ولانـي بشمـات
أقولهـا صـادق بنيـه سليـمـه
ربعك لها في مثلك آمال وهقـوات
آمالها كبرت وصـارت عظيمـه
وصارت توسم فيك حل الصعيبات
تذكرك ليـا دور غريـم لغريمـه
واليوم ينعاد النظر فيـك بالـذات
ياشين بعد السيـل لياجـات ديمـه
الزله من العاقـل ليامنهـا جـات
تمسي الظماير من وجعها سقيمـه
من كان له سمعه وجاه ومـروات
واجب عليه يصونها من الخريمـه
النـاس خالقهـا جعلهـا مقامـات
وكلن على فعلـه يعلـق وسيمـه
الرجل يختار الفعـول الجزيـلات
ويختار من بيـن الخلايـق نديمـه
ومن كان للريبه بوجهه علامـات
لايقول ظـن السـؤ فيـه ظليمـه
خلك مع اهل الطيب تمشي مسافات
وابعد عن اللي فالمعاصي مقيمـه
واصلح ضميرك واعتبر بالذي فات
يصلح عملـك وسكتـك مستقيمـه
ليا ضاق بالك من شديد الملمـات
إفزع لمن يحيي العظـام الرميمـه
وليانست من ذنبك ندامه وحسرات
سخره للطاعـه وقـود وعزيمـه
هذي نصيحه صغتها بضعة ابيـات
جاتك من عروش الفؤاد وصميمـه
ابغاك تقراها على النفـس مـرات
والعاقل يقولـون عقلـه خصيمـه