قدرية والصراب

قدرية والصراب
ياقدرية بالله اسمعي شوية
وارعوية كيف حالة الرعية
قولي لهم قاردت الغوية
الخير من صبحه مش من عشية
حان الصراب قدبانت العلامة
الريح ضرب وردت الغمامة
طير الوفاءجفجف من الدقامة
والجولبة ترقص مع الحمامة
الخير حان يرجف بريح علان
آن الاون قطف السبول بالاحجان
رعوي زمان مالوش مثيل للآن
خيره يبان ولبجته بمجران
ياقدرية العنصرةتحلق
والزوبعة من عادته تبرذق
والعوجري بالعرجشة يعلفق
والسوجري عازب يشاء يطلق
عبده اللخيجه في سباته غارق
والناس تقوم من صبحه تسابق
يلقطوا الغلة مع البلاسق
وهويسير يلقط الزوارق
ياقدرية ايحين تقولي شصحي
سيب محاجينه بكل مدحي
لايستحي ولارضي يدحي
مافيش طحين وهو يقله لحي
وقت الصراب ياغارة الله غارة
لافي اجب ولامعه غراره
حتي الشريم راح يستعيره عاره
واللي تعصب فلته وساره
ياقدرية لاتتركي شريمك
لمي العلف وعصبي وجيمك
ولاتخلي من جزع يلومك
ياسين على صبرك على هموك

رستم عبدالله القباطي