دنياك يا مخلوق يظهر بها اشكال
توريك صفحاتن وتكشف لك الغيب
تخفي عنك حال تبدي لك احوال
تكدر مشاريبن وتصفي مشاريب
يهفي بها اجيالن ويظهر بها اجيال
ولو اضحكت تبكي وفيها عذاريب
للمفتهم فيها جديدات وسمال
بيض لياليها وسودن غرايب
وفيها نهارن واضح يشعل اشعال
وفيها نهارن مظلم به لواهيب
احدن تذعذع له على روس الاقذال
واحدن يعيش من الوزا عيشة الذيب
دنياك تجري بين الاقفا والاقبال
واليا أوجهت غارات خيل مهاذيب
يالا دمي ما طاوعت كل عذال
كم ليعت بالبوق من يفعل الطيب
دنيا يبيد حيلها كل محتال
تدور بك دورات عجل الدواليب
بقفايها تعرض ولا ترحم الحال
وباقبالها تملا كبار المحاليب
انبيك يامن سلت عن بعض الاحوال
انشد ونالك حاضر الفكر ومجيب
ان كان تبي الرشد يا طيب الفال
ازبن على رزاق عكف المخاليب
ازبن على اللي في يده علم الآجال
علام ما بلكون مذري المعاطيب
الواحد اللي للصعيبات حلال
منقذ مداريكن ومبري مصاويب
اخلص لعلام السراير بالافعال
وناجه إلى صكت عليك اللواليب
ادعه يفرج لك الى صكك الجال
حلال عسرات الامور المصاعيب
اللي دعاه ايوب من ضيم الاهوال
وانجاه من حالن تزايد بها الشيب
الناس في دنياك كلن له اعمال
اتبع طريق العدل وابعد عن العيب
درب النقا بين ولك فيه مدخال
ومن باق ماله عند ربه مقاضيب
لا تلتفت للخلق راحل ونزال
مالك على ذرية آدم مطاليب
ورفيقك المامون حطه على البال
واذره الى جن الليالي شلاهيب
اجعل بقلبك له مقرن ومدهال
تلقاه ذخر بمعضلات المواجيب
عديل روحك لا تدور به ابدال
عونك اليا صكوا عليك المغاليب
ما هو بمن شيل العظايم بملال
يصبر كما تصبر على شيلها النيب
مفراص ماص للصعيبات فتال
صميل قيض وماضي له تجاريب
واحذر ترى بالناس مبغض وختال
ما له مراجل كود شذب العراقيب
عن مذهبه خلك على راس ما طال
وخله على فاله يشم المغاريب
البوم يسكن بالخرايب والاطلال
والحر مسكانه بروس المراقيب
طير السعد من كفه الدم شلال
بالمخلب الساطي عطيب المضاريب
ولا يغرك بالرخم كبر الازوال
وكبر النسور المهدفات المحاديب[center]